ولا مؤخذه يا قاضى ولا مؤخذه يا علاء

ولا مؤخذه عايز أسأل سؤال لما أجى مثلا وأنقل من الكلام اللى بيكتبه أى مدون أو مدونه وأعمل كتاب بيتكلم عن التدوين وألطع عليه إسمى أبقى أنا كدا عملت إيه؟؟

أيوة صح أخدت حاجه مش من حقى

بالظبط هو دا اللى حصل من القاضى – عبد الفتاح مراد – بعد ما أخد أكتر من 50صفحه من الشبكه العربيه لمعلومات حقوق الإنسان وأخد شرح كيفية إنشاء مدونة من عند مدونة بنت مصريه وبعدين ييجى فى الكتاب ويشدد على الملكيه الفرديه طيب يبقى مين اللى غلط لحد كدا؟؟

أيوة صح القاضى

اللى حصل بقى إن الناس اللى القاضى نقل من مدوناتهم مقالات وصور وصفحات كتير جدا كتبوا على مدوناتهم عن الحكايه دى وعن القاضى واللى عمله

يقوم إيه اللى يحصل؟؟؟

لا ، مش يرفعوا قضية على القاضى

القاضى يرفع عليهم هما قضيه ويطالب بقفل موناتهم ومواقعهم

النهارده بقى القاضى رفع قضية سب وقذف على علاء سيف وزجته منال وجمال عيد مدير الشبكه العربيه لمعلومات حقوق الإنسان ودا حصل بعد ما القاضى إتصور وهو خارج من المحكمه وتقريبا شد شويه مع المدونين اللى كانوا موجودين

المهم إن علاء سيف النهارده راح نيابة شمال الجيزة وبعدين رحلوه هو ومنال على مديرية أمن الجيزة للكشف على الحاله الجنائيه له وبعدين خرج الساعه 12 باليل

إقرا متابعه عن مالك

وعند نورا

ولا مؤخذه يا علاء ولا مؤخذه يا قاضى