المسيرى اللى مات

الدكتور عبدالوهاب المسيرى

طول عمرى بتعلق  بالأشخاص جدا ، ولما بقتنع بحد صعب أوى إنى أنساه ، حتى لو ماكنش فية أى علاقة مباشرة بينى وبينة

من ثلاث سنوات قريت للمسيرى ، كانت أول مرة أقرا حاجه لية ، شوية مقالات متفرقة ، ولما أزمة الحجاب بتاعت فاروق حسنى حصلت المسيرى كتب مقاله عن الأزمة ، المقالة دى كانت نقطة تحول حقيقية فى حياتى ، بدأ أقرا له كتير ، كان عنده إجابات مقنعه لكل اللى بيدور فى دماغى ، لما قريت كتاب (العلمانية الحزئية والعلمانية الشاملة) حسيت إنى فهمت الدنيا أكتر ، حسيت إن دماغى بقت أكبر بكتير ، إقتنعت بحاجات ماكنتش عارف أقتنع بيها وكسرت تابوهات كتير فى حياتى بعد الكتاب دا

كنت بحبة وبقتنع بكلامة أوى ، كنت بشوف فية أبويا ، ولما كان مريض ولازم يتعملة عملية زعلت علية زى ما زعلت على والدى لما كان مريض ، أصل الواحد مش كل يوم هيقرا أو يسمع عن واحد عظيم زى المسيرى

كنت بستنى أى لقاء أو أى حوار لية على التليفزيون أو فى أى صحيفة ، علاقةتى بالمسيرى كانت غريبة، عمرى ماقعدت يمكن قابلتة مرة فى لقاء عام لكن عمرى ما إتكلمت معاه ، بس كنت دايما حاسس إنى علاقتى بية شخصية وإنه عارفنى بالظبط زى مانا عارفة  …. كلامى غريب صح؟؟ كنت متخيل إنك هتقرى عن عظمة كتابات المسيرى ؟؟ أصلى مش محتاج أتكلم عن عظمة أفكارة ، أنا كان نفسى بس أقابلة قبل ما يموت

أصلة أكتر حد أثر فيا ، ماكنتش بقراله ككاتب ، وفيلسوف و أديب ، كنت بقرالة كمريد ، كحد مقتنع بأغلب اللى بيقولة

الله يرحمه ، عمل لنا كتير أوى ، للبشرية كلها

الناس كلها بتتكلم عن كتابات المسيرى بخصوص الصهيونية بس قليل أوى اللى بيتكلم عن كتباته التانية ، مع إنها ما تقلش أهمية بأى حال من الأحوال عن موسوعة الصهيونية

قبل ما المسيرى يموت كنت إتفقت مع حرنكش إننا نحاول نقعد معاه قاعده خاصة نقدر نتكلم فيها برحتنا ، وفعلا محمود قابل المسيرى فى أحد إجتماعات كفاية وحدد معاه معاد ، و كان هيسافر البحرين إسبوعين وبعديها هيرجع مصر ونقدر نقعد معاه  ، بس ملحقناش نقعد معاه بعديها بأيام المسيرى مات

وانا فى العزا بتاعه إفتكرت الموقف دا ، حسيت إن العلاقة بينا كانت قوية جدا ، حتى لومتقبلناش إطلاقا